ការគ្រប់គ្រងរដ្ឋជាក់ស្តែង មិនស្រួលដូចទ្រឹស្តីនោះទេ

ការការពារសេចក្តីសុខរបស់ប្រជាពលរដ្ឋជាង១០លាននាក់ មិនងាយដូចការនិយាយតែលើបបូរមាត់នោះទេ។ យើង​ម្នាក់ៗអាចនិយាយដោយស្រួល​នូវឧត្តមគតិ ឬទស្សនៈឧត្តុង្គឧត្តមផ្សេងៗ ដែលយើង​រៀនតាម​សៀវភៅ។ ប៉ុន្តែ ក្នុងការគ្រប់គ្រងរដ្ឋជាក់ស្តែង វាមិនងាយស្រួលនោះឡើយ។ សួរថា តើ​យើង​ធ្លាប់គ្រប់គ្រងស្ថាប័នមនុស្ស១០នាក់ ២០នាក់ ១០០នាក់ដែរឬទេ? តើវាពិបាកយ៉ាងម៉េចដែរ? នរណាៗក៏ដឹងពីបញ្ហាដែរ ប៉ុន្តែ មិនមែនប្រាកដថាមានដំណោះស្រាយនោះទេ ហើយ​រឹតតែពិបាករកប្រតិបត្តិករជាក់ស្តែង ព្រោះសម្បូរតែអ្នកលើកទ្រឹស្តីប៉ុណ្ណោះ។

លោក ហេនរី ឃីសស៊ីនជើ (Henry Kissinger) ជាអ្នកទទួល​ពានរង្វាន់ណូបែលសន្តិភាព ប៉ុន្តែ គ្រប់គ្នា​ស្គាល់គាត់ថា ជាអ្នក​នៅពីក្រោយការទំលាក់គ្រាប់បែកជាង២លានតោននៅកម្ពុជា។ លោក បារ៉ាក់ អូបាម៉ា (Barrack Obama) គឺជាអ្នកមានវោហារសាស្ត្រពេញដោយឧត្តម​គតិយ៉ាងខ្ពង់ខ្ពស់ ហើយ​ទទួលបាន​ណូបែលសន្តិភាពដែរ ប៉ុន្តែ យើង​មិនបាន​ឃើញ​គាត់កសាងសន្តិភាពអ្វីនោះឡើយ​ នៅក្នុងការគ្រប់គ្រងរបស់គាត់។

ពិតណាស់ថា យើង​ត្រូវ​យក​​ទ្រឹស្តីសៀវភៅមកធ្វើ​ជា​ជំនួយនៃការ​ពិចារណាថ្លឹងថ្លែង​ ប៉ុន្តែ ទន្ទឹម​នឹងនេះ យើង​ក៏ត្រូវ​ព្យាយាមប្រៀបធៀបខ្លួន និងដាក់ខ្លួន​នៅក្នុងស្ថានភាពគ្រប់គ្រងជាក់ស្តែងផង។